中環出更：愛妻送落葉 柯仔議辦珍藏
今屆立法會已經喺七月中完結，回顧過去四年可謂多風多雨，都令一眾議員覺得充滿挑戰、歷盡艱辛。好似做咗四年議員嘅九東直選議員柯創盛（柯仔）就最難忘《國歌條例草案》恢復二讀辯論嗰兩日，好多建制派議員都怕朝早返去立法會時會有阻滯，所以喺前一晚決定留守議會入面，而柯仔就係其中一員。
柯仔嘅議員辦公室入面，仲保留咗當時用嚟過夜嘅摺疊尼龍床同床褥被鋪，柯仔話呢個都算係佢四年議員生涯入面，最特別嘅記憶啦。之但係，講到特別就點都唔及一直放係柯仔議辦入面嘅一樽落葉同手製瓷片名牌，原來呢兩樣都係柯仔太太去旅行時，親手整畀佢嘅禮物。聽柯仔講，自從佢做咗立法會議員後，就冇時間陪老婆周圍玩，搞到太太成日要自己同朋友去玩，而佢議辦入面有一樽落葉，原來喺太太喺韓國街頭執起，以表達對夫君嘅思念。真係估唔到，原來樽落葉背後有個咁浪漫嘅故事啊。
馬逢國料議會前路艱難
至於做咗十六年進出口界議員嘅黃定光（象哥）就話，當年要完成《截取通訊及監察條例》嘅立法工作就最深刻喇，象哥話當年仲未有拉布文化，但因為大家工作都好認真，所以相關嘅立法工作由首讀、二讀，再去法案委員會，之後再返去恢復二讀辯論和三讀，嗰段期間可謂日以繼夜、夜以繼日咁做，搞咗兩晚通宵最終都趕及立法，象哥話經此一役，令佢深感香港立法程序真係好嚴謹好複雜。
即將退下火線嘅體育、演藝、文化及出版界議員馬逢國就話，喺八年前剛入議會時，佢好想改善議會文化，提升議政效率，但好遺憾幾年嚟唔單止冇改善，仲惡化咗，單係點算法定人數都超過五百次，佢相信來屆議會將會面對更艱難嘅歲月，但就勉勵大家有危就有機，佢認為只要大家一齊打拚，香港一定會有更好嘅明天。
卓妮