政情：劉燕卿獲任乳癌基金會總幹事
香港乳癌基金會宣布委任前申訴專員劉燕卿為總幹事，喺今個月二十二日生效。其實劉同呢個基金會早有淵源，佢早喺一三年出任基金會嘅名譽顧問，對乳房健康同乳癌議題有所認識，佢希望喺新崗位上，仍能服務公眾。
話與申訴專員性質截然不同
劉燕卿同我哋講，話由申訴專員公署轉任香港乳癌基金會總幹事，最大挑戰係前者專責監察政府同公營機構嘅公共行政，而後者就喺公共衞生同健康範疇上出力，兩者性質截然不同。然而兩者最大相同之處都係以服務公眾為己任。
香港乳癌基金會話劉燕卿喺公共行政上擁有豐富嘅經驗同深厚資歷，主席霍何綺華深信喺劉嘅領導下，基金會必定力臻至善、實踐使命。
劉燕卿喺一四年出任申訴專員，之前係擔任消費者委員會總幹事。而佢喺舊年三月底任滿申訴專員，年底就被委入廉署事宜投訴委員會，相隔大半年又有新職，睇嚟佢有排都好唔得閒。