中環出更：運動是良藥 鄭淇德避疫不忘踩單車
深居簡出，染疫風險無疑可大減，但若果缺少運動，則對身體絕無好處。香港醫療專業人士協會副主席鄭淇德係單車運動嘅愛好者。佢話三年前曾遭流感病毒入侵心臟，以致心臟功能只及正常人嘅一半，然而有賴長期嘅單車運動，如今毋須再靠藥物之餘，心臟功能亦告完全恢復，所以「運動是良藥」呢句話真係冇錯o架。
鄭淇德好推崇單車運動，但係佢就嫌香港過去嘅城市規劃，忽略咗單車族群，縱使政府近年對單車徑嘅建設較為積極，可惜工程進度緩慢。同鄰近地區相比，香港嘅單車文化頗為不足，鄭淇德話舊年聖誕節，佢喺台北火車站取用共享單車並隨即出發前往淡水，抵達目的地之後就將共享單車泊喺指定地點，然後就搭乘捷運返台北食晚飯。雖然台灣嘅共享單車令人回味，但佢認為依家疫情咁嚴峻，踩單車最好都係採用私人座駕。而佢屋企就有四、五部單車，以迎合不同嘅環境同場合。
施榮懷跑步返公司
香港珠寶製造業廠商會榮譽主席沈運龍（Aaron）亦係單車發燒友，佢話先前工作忙碌，已經兩個月冇做運動喇，直到上個周末難得清閒，就算烈日當空都要到郊外踩單車。本來先前每逢單車活動都會約埋成班朋友一齊去，但依家疫情嚴重，佢認為朋友間都係少啲見面為宜，所以單獨出行就算喇。至於近來嘅生意，因出入境受到限制，珠寶業嘅經營大不如前，而佢嘗試利用自己嘅博物館，同旅行社搞本地遊，但突趨嚴峻嘅疫情導致博物館被迫閉館兩周。Aaron話疫情難過，但總要面對現實。
中華廠商聯合會前會長施榮懷，就選擇以跑步嚟鍛煉體魄。因公司寫字樓位於筲箕灣，施榮懷通常由北角警署起步，沿鰂魚涌海旁跑番去公司。佢話呢段路風景優美，令佢更有動力Keep住做運動咁話。
卓妮