政情：食衞局又擺烏龍 覆函撈亂區議員名

趙柱幫變成張培剛

話說趙所屬嘅選區早前出現兩宗新冠肺炎確診個案，所以喺今個星期二，即係二十一號去信要求食衞局可以盡快幫確診者居住嘅兩棟大廈居民做病毒檢測。佢日前收到食衞局嘅回覆，傳真內容的確係關於病毒檢測嘅問題，但係上款就由趙議員變成張議員，仲寫住張培剛議員嘅辦事處地址。

趙柱幫話原本以為係自己搞錯，但佢真係二十一號去信畀食衞局。佢話食衞局分分鐘一次過回覆好多名議員相似嘅問題，所以唔記得改上款。佢批評食衞局做嘢咁草率，連信都覆錯，調亂咗檢測樣本同報告有幾出奇。

食衞局回覆我哋嘅查詢，承認錯誤將畀張培剛嘅回函傳真畀趙柱幫，向兩位議員致歉，會再聯絡佢哋喎。