中環出更：疫情再爆發 馬天聰：飲食業危中有機
本地飲食業好艱難咁捱過不斷延長嘅禁聚令，當以為見到隧道盡頭嘅曙光之際，第三波疫情又令食肆嘅營業限制回到起步點。本身都有經營餐飲業嘅總裁協會副會長馬天聰（Joe）前日出席一個網上討論會就提到，今次疫情無疑對業界帶來好大衝擊，然而「危」中亦有「機」，佢仲形容依家先係餐飲行業發展嘅好時機！
Joe喺飲食界打滾三十年，絕對係見慣大風浪，佢覺得今次疫情既係挑戰，亦都為業界帶嚟機會。
租金下降三成 更易請人
好似依家市面上有更多吉舖，令到仍然經營嘅餐廳在租金上有更大議價能力，對比以前業主年年都要求加租，依家嘅租金比以往低兩至三成；加上依家食肆都比以往更容易請人，政府亦有提供資助，覺得大家要把握機會裝備好自己咁話喎。
同場除咗有Joe嘅哥哥、總裁協會理事馬天明（Ray），仲有品牌發展局副主席黃偉鴻（Ellis），同埋香港中華廠商聯合會副會長史立德（Allen）。Ellis就講到，自己早前去幫襯一間餐廳時，有侍應用噴霧機幫佢消毒，令到佢思考有冇可能將一啲工業用嘅防疫機器，設計成可以畀商舖或個人使用，仲話呢個可能亦係新嘅商機都唔定！
史立德：膠板上可賣廣告
Allen亦都覺得喺疫情下商機處處，仲獻計畀一眾餐廳，提醒佢哋可以喺用以分隔食客嘅膠板上賣廣告；而工業界喺設計產品時，都可以考慮加入防疫元素，例如可以生產一啲有防疫功能嘅手機殼或者手袋咁。至於本身從事包裝製品生產嘅佢亦講到，最近亦都利用塑膠原料，整咗唔少口罩套，一於同市民攜手防疫添！
卓妮