政情：工作報告設動畫版 盧偉國：揀題材最難
現屆立法會任期即將完結，各位議員都陸續出版工作報告，總結過去四年嘅工作，工程界議員盧偉國尋日就喺Facebook度發文，提到自己除咗有「印刷版」同「電子版」工作報告外，仲推出「動畫版」，有真人、卡通，仲親自配音添！
呢四年發生太多嘢
成條片約十六分鐘，問番盧喺製作過程中有冇遇到咩困難，錄音有冇食螺絲咁，佢就話其實四年前都有用過動畫版嚟匯報，有經驗所以問題不大，加上科技發達咗，整動畫啲工作人員都好專業，過程好順利，但原來最大困難竟然係取材。
盧解釋，因為呢四年實在發生太多嘢，議會同社會都改變唔少，喺揀選片段內容時要取捨，所以今次報告比上次長咗大約一倍，但當中都係最基本嘅內容，想畀大家了解吓。盧又話各種呈現方式嘅受眾都唔同，動畫可以輕鬆啲，有佢嘅賣點，效果非常唔錯。