中環出更：疫下取消畢業禮 蘇裕康：學童健康更寶貴
第三波疫情爆發，教育局宣布全港學校再度停課。九龍樂善堂第二副主席蘇裕康，指儘管提早放暑假，但學童感染嘅機會仍不可抹殺，因為好多學校嘅畢業禮即將來臨，一眾家長同師生聚首一堂，疫情擴散嘅風險會好高。佢話為咗安全起見，惟有取消今個月下旬九龍樂善堂轄屬六所幼稚園嘅畢業禮。
蘇裕康話喺家長眼中，幼稚園畢業禮就係佢哋仔女人生首個畢業禮，因此特別重視，自然期望幼稚園畢業禮可以如期舉行，不過佢作為呢六所幼稚園嘅校監，亦要權衡學童嘅健康風險。由於幼稚園學生年紀細，就算去到升讀小學嘅階段，自律能力仍然十分有限，群組聚集嘅場合真係可免則免。佢話小朋友一旦染疫，痊愈之後肺功能亦可能受損，將來從事較劇烈嘅運動就會好辛苦，所以佢希望家長能夠體諒今次嘅決定，畢竟小朋友嘅健康非常寶貴。
陳李玉佩細女或冇得返英讀書
九龍樂善堂主席陳李玉佩，亦都設法減低一對仔女嘅染疫風險。佢話大仔同細女本來負笈英倫，但鑑於彼邦疫情肆虐，今年三月已經返港，並以線上授課嘅方式維持學習進度。近日細女所就讀嘅學校就發出通知，指暑假過後就係另一個新學期，要求學生返回校園上課，但陳太顧慮到當地嘅疫情相當反覆，因此佢打算設立後備方案，安排細女入讀香港嘅國際學校，直至英國嘅疫情徹底受控，先至畀細女返英國讀書。不過佢話要喺香港物色一所同英國學制銜接嘅國際學校，選擇頗為有限。
疫情不但影響校園，就連九龍樂善堂嘅董事局就職典禮亦延遲咗三個月。第一副主席彭志宏話再過幾個月，就輪到佢構思新任主席嘅致詞講稿。講起致詞，過去擔任國際扶輪社3450地區總監嘅彭志宏話，因3450地區包括香港、澳門、廣東省同蒙古國，合共幾十個地區分社，以致佢喺任期內經常奔走於各個地區分社嘅活動，創下一日發表八次致詞嘅個人紀錄。
卓妮