政情：疫情肆虐 徐英偉呻冇得去奧運
新冠肺炎疫情喺全球肆虐，仲搞到奧運會都要延期舉行，而本身有得去現場睇show嘅民政事務局局長徐英偉就大呻冇得去睇開幕禮喇！
東京奧運會原定喺今個月廿四號舉行，徐英偉話本身民政事務局「攞正牌」去當地觀賞奧運會，仲已經同副局長、政治助理等安排好行程、訂好晒機票同住宿、買埋紀念品，但都只可以取消。佢話覺得奧運會最好睇係開幕禮同閉幕禮，如果單單睇跑步比賽十秒就完未免唔夠喉啦。
盼下年搞得成
佢仲好擔心咁話，唔知一年後係咪真係搞得成，所以至今都未安排行程。但佢覺得香港好多精英運動員依家都處於黃金階段，去到日本一定可以喺各項賽事大掃獎牌，雖然今年取消，但都希望下年搞得成啦！