政情：假錄音瘋傳 何栢良：唔會寫錯自己名
本港第三波疫情大爆發，惹起公眾關注之餘，唔少市民都會用通訊軟件轉達疫情最新消息。然而近日瘋傳一段港大感染及傳染病中心總監何栢良嘅錄音，而何前日就喺社交平台貼文澄清錄音係偽造嘅，仲教市民點樣分辨真假錄音添。
頭兩句會有全名日期時間
何栢良喺Facebook發出聲明話「病毒唔等人、真假要識分」，澄清網上流傳嘅錄音係假冒嘅，呼籲市民唔好再傳。佢仲教大家點樣分辨錄音嘅真假，話真錄音頭兩句一定會介紹全名、錄音日期同時間，同埋唔會寫錯自己個名，更會有傳媒引用。佢仲話喺香港假冒醫生屬刑事罪行，會就假錄音一事報警。
其實網絡上已經唔係第一次傳出假冒何栢良嘅錄音，早喺本年四月份，多個通訊軟件群組就傳出聲稱係「何栢良醫生發出」嘅錄音，而當時何都有澄清，強調佢每次錄音都會講身份、日期、時間，但仍然有市民誤信謠言喎。睇怕疫情一日唔結束，都會有人「惟恐天下不亂」而繼續假冒何栢良。