政情：政府修例一意孤行激民憤 梁志祥嘆做建制派有辱無榮
呢屆立法會就嚟完結，之前講咗唔會再參選嘅議員梁志祥（祥哥）就喺離別前有感而發，總結呢八年嘅議員生涯得着。佢話好多人都覺得建制派同政府是合作夥伴，又必定係政府嘅應聲蟲，之但係一路以來都係政府有求於建制時就合作夥伴，掉番轉就未必理你，而據佢嘅觀察，政府接納建制派意見嘅情況唔敢話冇，但係絕少有。
梁志祥舉例，話好似上年嘅修例風波咁，其實部分建制派都曾經同政府提過修訂建議，但政府當初就一意孤行，之後民意極大反彈先死死氣話撤回，但建制派最後都為政府嘅行為「埋單」，市民都將不滿發洩喺佢哋身上。呢件事令佢諗到做建制派真係「有辱無榮」，覺得喺一個冇相同政策方針且較少吸納唔同意見嘅合作關係下，就搞到依家香港冇改善到社會深層次矛盾之餘，仲要加深咗，「咁咪車毀人亡」囉！
斥問責制名存實亡
被問到修例風波後，建制同政府之間嘅合作關係都未有得到調整時，梁志祥就話如果仔細留意就會發現依家若特首唔郁，其他官員都唔敢郁，大家都等緊特首嘅懿旨辦事。佢直斥，咁就係成個問責體制出咗問題，官員又好少去幫特首分析施政嘅政治形勢，表現唔好嘅官員又好似唔使負責咁，覺得真係要認真檢討同改革問責制本身存在嘅問題，同埋建制派嘅定位係乜嘢，否則多年後問題只會重複。