中環出更：林泳施細個成日忘熄水煲掣 學生：要拎滅火筒傍住
講求環保，必定重視水資源。捷成馬自然保育基金會日前為瑪利灣學校添置一部飲水機，期望下一代有一個更理想同健康嘅生活環境。講起飲水，好多港人都習慣要將自來水煲過，先至放心飲用，而瑪利灣學校校長林泳施憶起昔日自己上家政堂，經常都唔記得熄水煲掣，去到依家學生知佢要入家政室，都講笑話要拎個滅火筒出嚟傍住先啊！
正因為烹飪並非自己嘅擅長，令林泳施明白到每個人都有其長處同短處。喺發掘學生嘅才能上，林認為老師對學生嘅啟蒙好重要，所以佢無論幾忙，都會堅持每日面見兩個學生。林仲自爆做學生時從來唔溫書，望住一堆筆記完全記唔入腦。反而有同學同佢講一次筆記內容就會記得晒，於是佢先至發現自己係靠聽覺嚟學習嘅。
巢國明試過踢波周身傷
女仔鍾意煮嘢食，上家政堂，男同學又有咩玩呢？香港中小型企業總商會會長巢國明話，當年讀書當然無依家咁多資源同咁多嘢玩，但反而訓練到佢哋嘅創意，順手拈來都可以搵到自娛方法。巢以前會整吓手作仔、踢吓波，仲曾經因為踢波搞到成身傷痕而畀媽媽鬧！巢話現今網絡發達，小朋友容易喺網上搵到資料，比較無咁服從父母同老師，有兩位千金嘅巢都不禁慨嘆下一代難教啊！
香港島婦女聯會副秘書長歐陽鳳盈（Michelle），最近就為瑪利灣學校嘅學生講解生涯規劃。Michelle話自己求學之時，課堂上雖冇人同佢講生涯規劃，但係對佢做人處事影響至深嘅就係父母。Michelle話儘管家教好嚴，但爸爸樂於助人，又教佢「食得鹹魚抵得渴」、「我為人人，人人為我」。佢童年時又會跟媽媽做義工，去醫院探臨終嘅公公婆婆，哄老人家開心。
卓妮