俗語話「小暑過，一日熱三分」，意指過了小暑這個節氣，天氣會一日比一日熱，戶外工作，必須做好預防中暑措施。阿陽是一名攝影師，經常要到戶外工作，光哥是他的上司，常為阿陽提供健康生活方法及建議。
光哥問：「阿陽，揹晒袋去邊呀？」阿陽回答：「光哥！個客約咗今日出去影風景相！」
光哥說：「天氣報告話酷熱天氣警告現正生效，預測今日紫外線指數係11，暴曬級數極高！咪話我唔提你，我哋成日戶外周圍走，又熱又曬真係好容易中暑！」阿陽問：「咁嚴重？但要開工喎，我係咪要搽番啲太陽油呢？」光哥提醒：「在戶外活動或工作，最好穿着淺色、通爽、鬆身嘅長袖衫，同戴闊邊帽或者擔把遮，盡量留喺陰涼有遮蔭的地方工作，開工記得帶定一大支水，飲多啲水補充水份同埋定時去涼嘅地方休息吓呀！」
阿陽說：「我仲諗住搽啲太陽油就得！」光哥回答：「預防中暑措施梗要做足啦！你亦可以搽埋防曬系數SPF 15或以上嘅太陽油，但喺陽光下超過兩小時，或出汗後就要補搽喎。」阿陽恍然大悟：「完全明白！光哥，咁我去準備吓先！」
在又熱又曬的環境工作，如果覺得口渴、頭暈、頭痛、作嘔、全身無力，或覺得唔清醒，可能係中暑嘅先兆。自己最了解身體狀況及異常，萬一出現以上症狀，應該怎樣自救呢？第一，勿死頂，立即停止手上工作，到陰涼的地方或有冷氣地方休息。其次是降溫，鬆開衣服，搧涼，或用濕毛巾抹身，幫身體盡快降溫。最後記得補水，休息同飲水，若大量排汗，可飲用補充電解質（含鉀或鈉）的飲品。
職業安全健康局
www.oshc.org.hk