政情：鬧港府效率低 檢測費昂貴 陳恒鑌促快落實健康碼
政府早前擬推出粵港澳三地互認健康碼，方便經常需要跨境工作、返學嘅市民，但有關措施至今仍未付諸實行。有政黨昨去信特首林鄭月娥，要求政府盡快推行同落實健康碼，仲話澳門已經落實，港府亦應該盡快實行。
指唔少市民急需前往內地
議員陳恒鑌（Ben）話唔少市民因為工作、學習、或者緊急嘅事務而急需前往內地，但港府一直未有交代健康碼嘅最新進展。佢要求政府盡快逐步開放健康碼嘅名額，又話本港嘅病毒檢測服務雖然已經回落至約九百元，但相比起內地嘅檢測費用都仲係十分昂貴。
另有議員話早前已經同食物及衞生局局長陳肇始及特首辦會面，一直要求盡快推出港版嘅健康碼，立法會內務委員會亦四次討論健康碼嘅事宜，大鬧政府至今仲未搞掂。其實陳肇始早前話「港版健康碼」已經大致完成，但依家影都冇。政府辦事嘅效率有幾高？相信市民心中有數喇！