政情：郭偉强：攬炒派氹支持者抗爭 如情緣騙局呃錢偷心
依家嘅騙案可以話係層出不窮，網上情緣就係其中一種騙徒手法，議員郭偉强將騙局理論套用到依家嘅「黑暴」事件。
郭偉强日前喺社交平台開Live，話近日睇到新聞報道有婦人不幸墮入網上情緣騙局，唔止畀人呃感情仲呃埋錢。佢分析呢類騙局不外乎都係騙徒利用甜言蜜語氹受害者，而受害人又甘願無條件咁付出。
批評利用作政治籌碼
騙案同攬炒有乜關係？郭偉强話正正好似攬炒派氹支持者一齊抗爭咁，佢哋嘅甜言蜜語就係同大家一齊嗌口號，叫大家一齊爭取訴求，令到一班支持者相信大家距離好近，向住同一個方向進發，追求更美好嘅事。由於受害者相信攬炒派為全人類好，甚至為地上嘅一隻螞蟻好，就覺得要付出幾多都冇所謂，甘願畀錢買物資，幫人買危險品，甚至畀警察拘捕。
郭偉强提醒呢啲嘢係冇回報，由頭到尾都係一場騙局，騙徒只係想利用支持者做政治籌碼，希望大家醒吓咁話。