政情：帶議員遊花園 唔聽提問 林偉喬開會發夢捱轟
近年唔少人批評政府官員表現差，喺立法會上更多被議員鬧爆。政府資訊科技總監林偉喬尋日出席會議，期間仲因為答唔到問題，甚至議員問完唔係即時回應，畀議員柯創盛（柯仔）先批評遊花園，其後因為林偉喬冇即時回應問題，柯仔就斥「發緊夢呀？咁你個魂返嚟未呀？阿Sir！」
立法會財務委員會尋日討論開發新嘅電子檔案保管系統，打算喺政府全面推行，涉款約十二億三千萬元。柯仔關注政府到時點樣去揀承辦商，擔心會有利益衝突，甚至筆錢會否變相跌落鹹水海。林偉喬回應話會有好完善嘅項目管理機制處理，多個部門都會有成員管理，推行時仲會有培訓，令部門知道個系統點推行。點知就畀柯仔鬧爆，話政府嘅盲點就係「講就天下無敵，做就無能為力」，仲話一牽涉得多政府部門，統籌力就會弱，之後佢再希望林偉喬再具體啲去解釋，亦要求林回應問題，點知過咗都有半分鐘都冇人回應，柯仔鬧完之後林仲要求重複添，所以柯仔重複問題時都好激動。
噏錯國安公署隸屬警務處
唔少議員都好關注私隱問題，議員譚文豪關注國安公署會唔會進入系統，林偉喬話要搵番相關部門先睇到，其後佢又話國安公署係屬於警務處之下，點知全場嘩然、仲畀議員寸國安公署點隸屬警務處，佢先再問番譚到底係講國安公署定係國安委員會。最後林偉喬都係搞唔掂，要創科局副局長鍾偉強幫手答。雖然畀議員鬧爆，不過最後議案都喺二十八票贊成、十二票反對下獲通過。