政情：專組治港台用人唯「財」 被斥假檢討真敷衍

政府成立嘅專責小組由丁葉燕薇擔任小組主任，而成員包括港台助理廣播處長張健華、來自行政主任、庫務會計師同管理參議主任等職系嘅現職公務員同埋退休後服務合約僱員等。商務及經濟發展局嘅發言人話檢討過程會同港台溝通，但專責小組唔會參與任何節目製作或編輯決定，預計檢討工作喺六個月內完成。

料難解決節目內容偏頗等問題

專責小組嘅工作範圍包括檢視港台嘅財務管理、人力資源管理、採購事宜；設立公開同客觀嘅機制訂立表現指標同準則；檢討港台嘅整體管理制度、工作流程同執行方式、參考其他公共廣播機構嘅最佳做法。商經局嘅發言人話，上述決定都係確保港台喺人力同資源符合政府規則同《港台約章》、遵守通訊事務管理局嘅節目標準業務守則等。

議員葛珮帆（EQ）就話睇完專責小組名單，覺得識得管錢嘅官員比較多，雖然港台出名大花筒、財政管理不善，政府搵人睇實盤數係理所當然，但指出港台最大嘅問題係部分節目內容偏頗、歪曲事實、幫暴力示威者嘅行為粉飾囉！但專責小組只有一位官員具有廣播事務嘅經驗同能力，EQ認為市民難以接受。

EQ又話政府成立嘅專責小組，望落都唔諗住處理節目內容偏頗等「重中之重」嘅問題，亦冇能力確保港台製作節目時遵守《港台約章》，質疑政府究竟真係打算「檢討」，定係「敷衍」市民呢？佢直斥專責小組係「做吓樣」、「交代吓」，佢仲表明會繼續向政府追問添！

丁葉燕薇帶領 被指欠相關經驗

資訊科技界議員莫乃光就持不同意見，認為政府冇必要成立專責小組，擔心專責小組會凌駕於港台之上，對員工造成不必要嘅壓力。佢又質疑專責小組並非淨係處理技術性個問題，反而有機會影響港台嘅決斷。

香港電台節目製作人員工會關注丁葉燕薇喺傳媒、傳訊同新聞方面都冇經驗，質疑佢係咪有足夠判斷力同「主觀意志」，作出合情合理嘅檢視定係以政治壓倒一切，希望專責小組可以加入員工代表，反映製作實況，唔應該漠視前線員工聲音。