中環出更：談難忘作品 李國興首推西環貝殼泳池
要打造一個美麗嘅城市，在樓宇設計及園藝一環相當重要，背後一班專業人士是勞苦功高，仲有一班新血加入，令城市更加迷人。卓妮尋日喺香港青年建築設計比賽頒獎禮中，見到香港建築師學會會長李國興，問起佢點解會入呢一行，原來佢自細就對建築物好有興趣。
李國興話細細個已經鍾意畫建築物，出街亦會留意樓宇設計，久而久之就變成興趣。咁近來有冇深刻嘅設計作品？佢話其中一個係堅尼地城泳池，因為個地勢好似三角形咁，設計上有一定嘅困難，費盡心思之下有次行經海旁，突然靈機一觸，發現可以用貝殼形去設計，一來泳池近海，二來又係水上活動非常貼切，建築完成後非常滿意。
「森林‧浴」設計奪一等獎
攞到一等獎嘅係「森林‧浴」，主題取其「沐浴於森林」中。隊員有譚偉豪，江展蔚同梁舜婷，問到佢哋點樣構思到呢個設計出嚟？譚話因為現今都市繁忙，團隊希望可以設計一個空間，坐落喺城市中心，讓工作忙碌嘅都市人進入之後，可以透過水療同四季唔同品種嘅植物陪伴下，讓人置身於森林中沐浴，可讓人洗滌心靈同紓緩壓力之用。咁喺邊度攞靈感？江就話自己去過日本、馬來西亞同芬蘭，嘗試過當地浸浴文化，參考特點後，用喺呢次設計上面。
籌辦今次活動嘅議員謝偉銓，本身係測量師，問到佢點解會讀呢一科？佢話讀書嘅時候，發現地產類型嘅行業比較穩定，有前途，所以就決心考入大學進修。咁有冇諗過入錯行？佢就話OK啦，攞到個專業牌生活上都好穩定，佢仲話好開心見到好多有志年輕人加入呢行。
卓妮