政情：公民講場：健康碼叫極都冇 旅業停擺勁煎熬

疫情有所緩和，好多行業都恢復運作，唯獨旅遊業仍然維持停擺狀態，以致數以十萬計嘅旅遊業從業員，若非做兼職以維持生計，就係手停口停「等運到」。要改變旅遊業無了期停頓嘅困境，最好就係恢復適度通關，同鄰近地區進行健康碼互認制度以啟動「旅遊氣泡」，咁就可以喺控制疫情同經濟民生之間取平衡。然而「港版健康碼」講極都只聞樓梯響，推出日期一再延後。反觀澳門同廣東省早就通過健康碼互認制度。點解人哋做得到反而香港就做唔到呢？食物及環境衞生局局長陳肇始似乎欠港人一個解釋咁囉。