政府早前就「香港重新出發」項目招標，旨在向海外對象宣傳香港經濟復甦，藉此重建香港嘅國際形象。而政府新聞處尋日公布Consulum FZ LLC（Consulum）通過公開招標程序，投得項目嘅公關服務合約，中標價為六百二十八萬九千二百一十五美元（約四千八百七十四萬三千港元）。
新聞處表示，喺上月十五日截標之時，共接獲七份投標書，經評審後Consulum獲批為期一年嘅合約。而該公司將擬備傳訊策略、市場推廣同埋廣告宣傳計劃，以凸顯香港經濟復甦同協助重振外界對香港作為投資、營商和安居樂業之地嘅信心。但香港經歷逾一年嘅反修例風波早就已經滿目瘡痍，真係一個宣傳項目就可以挽救形象？
而政府就表示，相信項目有助香港喺全球新冠疫情減退後，逐漸重開同迎接商機及旅客時，同世界各地人士重新接軌喎。但疫情繼續喺全球肆虐，究竟幾時可以恢復正常通關都未知。究竟項目幫香港「重新出發」，定係政府「倒錢落海」？市民就要拭目以待喇。