大圍海鮮檔 反轉價錢牌呃客
【本報訊】做生意講求明碼實價，童叟無欺，如果博懵呃人，隨時被拆穿！近日就有大圍街坊爆料，聲稱區內有黑心海鮮檔，不但會趁人不留意偷換價錢牌，被人當面拆穿後態度更加惡劣，街坊看過後似乎頗有同感，更直言：「一早冇幫襯。」
街坊：被踢爆「仲惡過你」
網民Samson Chan上周五（26日）於Facebook群組「大圍友聯盟」發文指，大圍積輝街有海鮮檔做生意時十分蠱惑：「當你睇中條魚or（或）海鮮，例如明明係40蚊，佢哋會博你攞錢時，就好快手反轉個牌，跟住收你45蚊」，又指自己親遇事件，踢爆對方後竟遭冷言相對：「係呀，唔小心反轉咗」，貼文指檔主「好惡問你要唔要，話係45蚊先啱」，自己最終聞言即走。
發文者稱涉事海鮮檔由舊街市轉來，實屬慣犯，但先前被拆穿還會道歉，「識做收番平個價錢」，如今被人踢爆，隨時「仲惡過你」。貼文又提醒眾人小心：「留意有啲價錢牌係兩面，差3至5蚊。100％係等你攞錢時用老千手法反轉去貴嗰面」，又表示相信已經有許多苦主受騙。
有街坊看後大有共鳴，有人分享被騙經歷：「上次買蝦，78蚊斤，我話要半斤，佢話食多少少好唔好，然後收我50蚊，返到屋企，用磅磅吓，半斤都冇，得227g，好過分」，亦有人質疑其海鮮質素：「買過佢鮑魚一次，有冇收多我就唔記得，但最記得放鮑魚落啲水好鬼黑……」貼文其後引來疑似檔主回覆，指自己「做生意一就一，二就二」，在區內做三十多年生意，希望消費者「分清楚黑同白」。