政情：誓阻港獨 周浩鼎引楊岳橋「名言」
作為大律師嘅議員楊岳橋曾經喺一六年講過如果有人想搞香港司法系統，要先「Over my dead body！」（跨過我的屍體），最終成為咗佢嘅名言，唔少人仲會拎嚟抽水嘲笑添。事隔幾年，身為律師嘅議員周浩鼎（Holden）尋日有樣學樣講「Over my dead body」，但唔係講司法系統，而係講緊搞港獨。
斥大律師公會政治先行
Holden尋日喺電台節目入面，形容亂港嘅極端分子毫無道德，籲各界攜手對抗極端分子，話如果有「極端分子」想搞港獨，要先「Over my dead body」。佢仲批評大律師公會早前話「港版國安法」賦予特首有權指定法官處理案件會削弱司法獨立同破壞一國兩制，指公會講法「絕對錯誤」同「有誤導性」，佢解釋《基本法》規定各級法院嘅組織同職權由法律規定，行政長官有權任命獨立委員會推薦嘅法官，批評大律師公會「以政治立場先行」。