政情：陳健波斥攬炒派撈油水 搞到港人雞毛鴨血

波哥日前喺社交平台上載咗段短片，話為咗解決問題，若果大家肯溝通、互相讓步就會變成雙贏，大家都有着數；其次係你贏我輸，為自己爭取最好嘅條件，而最差嘅就係唔肯妥協，不擇手段，最後係攬炒，同歸於盡。

點解明知會同歸於盡都做呢？佢話事關好多人，尤其有啲有法律背景嘅人士，知道全球經濟將會進入成熟期，未來一班年輕人將會更為艱苦，於是投其所好，話問題係出於機制不公，要推倒重來，嗰班人都係覺得有市場、有選票先咁講，佢哋其實係想撈油水。

普通市民無辜被牽連

有啲人明知攬炒會玩殘香港，但係都博一博。佢話呢啲人搏到就可以操控議會，逼政府就範，唔得就走佬去外國，佢話有啲人一早就鋪好路，有啲仲話自己喺香港被迫害，所以要去外國申請庇護添！

波哥話有啲鼓吹攬炒又唔會衝上前線嘅人早就搭好路，有需要去外國嘅話必定有人照應，最可憐嘅係一啲以為自己做咗好偉大嘅事，結果淪為階下囚嘅人，而普通市民仲慘，佢哋根本唔同意攬炒但無辜被牽連，有人冇咗份工，亦有人嘅舖頭被破壞，害到香港人雞毛鴨血。