政情：為護短恐拖垮增產假 泛民死撐拉布合情理
涉及將法定產假由十周延長到十四周嘅《二○一九年僱傭（修訂）條例草案》，前日喺立法會恢復二讀辯論。人力事務委員會主席鄭泳舜尋日喺電台節目中表示，擔心草案未能喺今屆會期內通過，需要喺下屆重新再來，即要拖多幾年先可以落實。
鄭泳舜話反對派議員喺過去幾個禮拜都惡意用「點人數」嘅方式「拉布」，上個禮拜三同禮拜四點咗約二十次，而前日大會喺冇民主派議員在席嘅情況下，仲因為人數不足而流會添。佢話本身諗住前日審議八個鐘就可以通過修訂，但最後連二讀都未過到。鄭又話會期所剩無幾，再咁落去有機會拖垮草案，仲強調勞資雙方目前已有共識延長產假，唔希望再出現阻滯喇。
疑搏命拖 阻兩譴責動議
但公民黨（公文袋）議員郭家麒反駁話，當日喺大會發言嘅民主派議員都支持延長產假，認為草案一定可以喺今屆會期內通過。佢又批評建制派將《議事規則》同議會扭曲得好離譜，民主派議員點人數合情合理，仲需要畀全港市民知議會已經失效喎。
其實緊接落嚟嘅大會議程仲包括兩個譴責泛民議員嘅動議，唔知係咪泛民要「護短」，所以就算贊成增產假，都要搏命拖呢？但會期結束之前就得番兩次大會，會唔會「拖死埋」增產假呢？