政情：楊岳橋背棄誓言 認衰自摑 咪再狡辯

AY曾經講過「Over my dead body」，事因佢喺一六年參選嗰陣，話自己會努力守護司法獨立，仲講如果有人想搞香港司法系統，「Over my dead body！」唔少後生仔成日攞番呢句嘢嚟抽水，仲開咗個社交網站專頁「每日關心楊岳橋變dead body的情況」，每日一篇咁嘲笑AY。

當年AY呢句「名言」，一班支持者自然視之為承諾，但四年時間過去，原本係支持者嘅都批評佢得個講字背棄誓言，兼唔覺佢有乜嘢實質政績為捍衞香港司法獨立企出嚟。AY睇嚟知道事隔四年都走唔甩，喺網上平台開直播嗰陣認衰，為言論道歉，話自己當年因為一時有情緒，又甩咗稿而失言。

網民斥政棍 坐喺度白袋人工

AY更加話如果有時光機，佢會同當年嘅自己講「你講大咗」，但佢話唔會就咁望住香港法治受威脅喎。但有網民唔收貨，話佢因為「選舉近了」先道歉，呢四年都冇做過啲乜嘢彌補當年嘅「失言」。有網民更加形容AY係「政棍」，坐喺度白袋人工，仲有網民叫佢交個「dead body」出嚟先好講嘢呀！

「案底令人生更精彩」 鼓吹犯罪

失言又點只呢次，例如佢喺一七年出席反新界東北發展案聲援集會嗰陣，講到自己以前成日同犯事嘅後生仔講，案底對人生有好大影響。但就覺得因為反東北案同衝擊公民廣場而被判入獄嘅年輕人擁有「呢個案底令佢哋人生變得更加精彩」。

呢番言論唔止喺坊間引起巨大爭議，亦畀建制派捉住嚟鬧，質疑佢竟然鼓勵市民犯罪。AY嗰次嘅反應比起今次快，同樣解釋自己係「失言」，話自己表達唔恰當，向東北案被告同埋社運界人士道歉。

作為大律師，口才應該好叻o架喎，因乜解究AY會搞成咁呢？睇嚟佢唔單止要認衰，都要學吓乜嘢叫慎言嘞！