中環出更：滅罪委員冇泛民區議員份 民政局：用人考慮多因素
過去全港十八區嘅分區撲滅罪行委員會（滅罪會）委員，當中往往會有民主派區議員在內。政府近日公布新一屆滅罪會名單，有民主派區議員話曾收到當局邀請加入，但最後卻榜上無名，取而代之嘅係建制派區議員，但政府亦無解釋原因。民政事務局就話政府一向以用人唯才嘅原則物色合適人選。
以觀塘區為例，舊年十一月當選區議員嘅民主黨尹家謙話，收到民政事務處邀請加入滅罪會，調查完佢冇刑事案底紀錄之後，冇咗下文，又冇解釋唔委任佢嘅原因。政府最終委任六個建制派區議員，包括民建聯張培剛、梁騰丰、工聯會簡銘東同九龍社團聯會呂東孩、陳耀雄同符碧珍。元朗區同樣冇民主派區議員份，當區區議員伍軒宏話都係透過政府人員通知，冇民主派議員出任委員，佢覺得好奇怪，而獲委任嘅兩位區議員同為鄉事派，包括楊家安同鄧鎔耀。
民政局話政府用人會考慮多個因素，好似專長、經驗、服務社會嘅熱誠等，透過唔同嘅途徑吸納，有意服務社會嘅合適人選。到底係咪因為民主派議員不時同政府作對，尤其不滿警方喺示威衝突現場濫用武力，所以唔安排佢哋出任委員，以作為懲罰呢？睇嚟只係得上任兩個月嘅民政局局長徐英偉先知嘞！
卓妮