中環出更：施家殷：殺菌塗層效佳亦要注重衞生
疫情已持續半年，市面上出現各式各樣嘅消毒用品，有團隊亦利用科技抗疫。扶康會轄下嘅康融服務成為科技大學殺菌塗層服務團隊之一，係當中第一間獲認可嘅社會企業。卓妮之前去咗記者會，一眾團隊都分享除咗採用呢項技術，仲有各式各樣嘅防疫措施。
扶康會董事局主席施家殷（Kyran）覺得殺菌塗層科技可以徹底消毒，效用仲好長，打算為自己嘅私人公司同屋企預約做呢項服務。但佢都冇特權，照樣要排隊預約專業團隊上門服務，更加話如果有需要人士想盡快使用服務，佢唔介意畀人「插隊」。Kyran話唔單止用殺菌塗層，都要着重個人衞生，佢話屋企放咗足夠嘅口罩同消毒品，做好第一道防線。
有消毒用品固然重要，但都要靠人去好好運用，康融服務主席錢國强（Kenny）話殺菌塗層服務團隊主要由殘疾人士組成，當中用咗大約個幾月時間訓練。Kenny覺得訓練殘疾人士唔係特別困難，但要畀多啲機會佢哋「實戰」，練習隻手定啲同埋留意要消毒細微嘅地方。佢話社企喺疫情前一直有提供清潔服務，例如滅蟲殺菌同空氣消毒，認為平日都要多保持環境衞生。
徐群燕：疫下帶院友遊車河解悶
疫情之下院舍都要打醒十二分精神應對，扶康會總幹事徐群燕話疫情最緊張嘅時候都唔敢畀啲院友出街，折衷方案係帶院友「遊車河」，穩陣起見都唔畀佢哋落車，但總算等佢哋照樣有機會出街接觸唔同事物。最近疫情緩和會帶院友落樓下平台曬太陽抖抖氣，但始終少咗機會郁動，院舍員工拍片帶領大家做運動，強身健體。
卓妮