政情：公民講場：港版健康碼 檢測費用貴到離譜 價格任定令人卻步

為咗方便粵港澳居民往來，港府即將實施健康碼互認計劃，出入境就毋須強制檢疫十四日。不過港人要取得健康碼，就要先付一千多至三千多元嘅檢測費，反觀廣東省嘅收費不但遠低於香港且價錢劃一，結果健康碼未推出就惹起費用爭議。雖然食物及衞生局局長陳肇始話透過市場競爭，降低檢測價格，不過港大深圳醫院院長盧寵茂就批評，港府不但冇採取穩定價格嘅做法，反而任由私營醫療機構自由定價，完全零干預。當大家以為藉住健康碼可以方便往來，誰知貴到離譜嘅檢測費，已經令人望而卻步。