政情:垃圾徵費計劃報廢 張宇人指欠經濟誘因

政府曾推出多種方法希望達至源頭減廢,包括建築廢物處置收費計劃,以及加強回收等。當局於兩年前更提出了建議實施俗稱「垃圾徵費」嘅都市固體收費計劃,但係立法會負責審議嘅法案委員會日前通過終止審議工作。飲食界議員張宇人就喺Facebook上發文,形容政府喺減廢問題上面係用錯咗方法。

稱應為業界提供稅務優惠

張宇人話飲食業界並非唔支持環保,但覺得政府經常以「污染者自付」原則為名,向業界徵收各種環保費用,形容政府就好似用阻嚇手段叫人減廢,質疑咁樣做係咪真係會有成效,仲話要減少垃圾唔係單單靠收費就可以全面解決問題咁話喎。

張又講到,政府應該要為業界提供更多稅務優惠等經濟誘因,鼓勵佢哋參與以垃圾分類、回收同循環再造等形式減廢。佢仲話,政府要喺推行垃圾徵費前,必須要先減差餉,避免雙重收費咁話喎。

查實當局曾指垃圾徵費就係經濟誘因,盼藉此改變大家以為丟棄垃圾不需成本嘅觀念,但睇嚟市民同業界唔係咁受落喇!

第一手消息請下載on.cc東網iPhone/iPad/Android/Windows Phone Apps