中環出更：政府擬規管風火輪 田北辰嘲無牙虎
政府近日有意規管「電動可移動工具」，容許俗稱「風火輪」嘅電動單車輪，以及電動滑板車可以喺單車徑行走。議員田北辰（田二少）認為要保障單車徑使用者嘅安全，佢原則上係支持，但一講到如何執行，頭上就不禁冒起好大個問號嘞。
質疑難以執法
田二少日前喺社交網站發文，指「風火輪」等電動滑板車已經喺香港流行咗一段時間，行行吓路突然有人光速飛過，一唔小心就會出意外。依家政府打算容許市民可以喺單車徑上使用「風火輪」，不過就算有法例，又點樣執法呢？田二少話依家喺單車徑踩單車雖然都有限速 ，但係佢同孫仔去踩單車，不時都有超速嘅單車手呼嘯而過，但最終都唔見有人影快相執法。既然冇人執法，立咗法咪又係冇牙老虎！
佢又話曾經喺立法會質問過運輸署助理署長梁少江，就係點樣喺單車徑上對超速單車同「風火輪」執法？結果對方啞口無言，足足dead air咗幾秒咁話。佢認為一條新嘅法例，若果難以執行，或者冇人執法，咁同冇法例有咩分別呢？立法會議員諗到嘅問題，政府官員做咗成年研究都竟然諗唔到！如果政府真係打算立法規管以確保單車徑使用者安全，不如認真做研究諗吓點樣執法限速仲好喇！
卓妮