中環出更：馮永基談建築「無題」最棘手
雖然想像空間可以無邊無際，但一講到無題創作，反而會好傷腦筋。為鼓勵殘疾人士積極參與藝術活動嘅「無障畫創大賽」，今次比賽主題係「無題」，希望參賽者可以唔受約束咁自己決定畫畫主題。而喺日前嘅頒獎禮上，卓妮就同其中一位評審，中文大學榮譽建築師馮永基傾過，佢都認為以建築而言，「無題」真係好棘手。
馮永基就話每個建築項目都有特定嘅用途，當中亦牽涉巨額投資，以「無題」做建築有一定難度，自己寧願有清晰嘅界線。馮話濕地公園係佢做過最大嘅項目，正因為空間好大，界線超越自己平日嘅理解，都覺得有難度。佢覺得建築絕不輕鬆，因此多年以來，畫畫都係令到自己鬆弛一下嘅方法。馮反而覺得「無題」喺畫畫上比較可行，但又唔係百分百「無題」，因為一張畫紙嘅尺寸某程度上都為主題加咗一種限制。
伍韶勁話創作要貼地
另一位評審，浸會大學視覺藝術學院助理教授伍韶勁，主要係做場地主導嘅藝術項目，佢話好多時已經畀個場地限制咗創作主題。雖然好多人一聽到「無題」就以為係天馬行空咁創作，但伍韶勁就認為要「貼地」啲，既然主題唔受限制，不妨用多啲時間同心思發掘日常生活中嘅可貴之處。
本身係大提琴演奏家嘅藝術發展諮詢委員會委員蘇曉明（Helen），主張藝術不應劃分種類，無論音樂、繪畫、戲劇等都係對美感嘅追求。佢自己就對視覺藝術有興趣，雖然比較少接觸繪畫，但會參觀畫廊同博物館。Helen好支持藝術共融，覺得即使係殘疾人士都擁有同樣嘅藝術天分，個人風格仲更加突出。
卓妮