政情：傾教材編製 阻選主席 民主派又耍無賴
教科書同教材嘅編製近年備受關注，立法會早前成立咗研究幼稚園、中小學教科書及教材編製小組委員會，不過就因為民主派拉布，所以仲未選到主席，有建制派議員建議開特別會議討論，但最終支持同反對嘅票數相等，所以開唔成。委員之一嘅議員張國鈞（Horace）就批評民主派刻意拉布，斥阻礙小組委員會選主席係非常無賴。
張國鈞斥唔肯面對問題
雖然建制派嘅建議未獲通過，不過教育事務委員會主席葉劉淑儀早前決定召開特別會議，仲發問卷諮詢議員添。Horace就話教材問題收到唔少投訴，社會同家長都好關注，近日亦有資深大律師話喺律師執照嘅試卷中都有政治性試題，認為民主派議員即使覺得教材冇問題，都應該要喺議會上討論，而唔係一味迴避，甚至批評教育界議員葉建源都唔肯面對問題，所以先搞到咁大爭議。
對於葉劉淑儀決定召開特別會議，作為事務委員會副主席嘅葉建源就直斥做法霸道，仲話對於動議不獲通過仍發通告開會感到驚訝，事關未獲通過嘅動議就等同否決。佢仲話，如果葉劉堅持開會，應該要搞清楚會議係咪符合議事規則。