政情：泛民被轟雙重侮辱女性
民主派議員多次喺大會用「點算法定人數」嘅方式拉布，上個禮拜仲搞到流會添！但《國歌法》都通過咗啦，點解仲要拉布呢？據悉，泛民係想拖延議員容海恩（Eunice）動議譴責議員毛孟靜（毛婆）嘅議案。而後日嘅大會將會討論《二○一九年僱傭（修訂）條例草案》（延長法定產假），Eunice就話如果民主派為咗唔傾譴責毛婆嘅議案，而拖垮延長法定產假，鬧爆咁就真係「雙重侮辱女性」啦！
本屆立法會會期所剩無幾，無論建制派定民主派議員都「唔使再忍」，做事都去到盡。多位民主派議員早前喺會議上用「積極發言」嚟拉布，近期仲要係咁點人數，甚至不惜用掟「臭彈臭蟲」阻撓會議進行，建制派亦都忍無可忍，就「臭彈臭蟲」事件去警署報警，實行「玩到底」。
毛涉歧視容海恩孕期獲提名出選
據悉，泛民繼續拉布，主要係想保毛婆。根據Eunice提出嘅譴責議案，就係毛婆涉對懷孕議員存有偏見同埋公然歧視懷孕女性。話說立法會保安事務委員會當時選舉副主席，而毛婆質疑Eunice要生BB，最少需要放「前四後六」嘅假期，話應該撤回Eunice嘅副主席提名。而Eunice便就毛婆嘅言論提出譴責動議，話要狙擊到底。
咁啱本周三大會討論延長法定產假，Eunice預計民主派會係咁「點人數」，力求拖延譴責議案。佢認為就算譴責毛婆嘅議案可以展開討論，但剩低嘅會期咁少，都好大機會傾唔完。Eunice話如果泛民真係「拉布」，就會先拖垮改善婦女權益嘅延長法定產假，民主派漠視婦女權益嘅罪名就「走唔甩」；亦會拖延接落嚟討論譴責毛婆嘅議案，前後加埋泛民就會喺一日內連續兩次漠視女性權益、雙重侮辱女性啦！
譴責郭榮鏗議案 亦大機會傾唔到
其實仲有譴責議案排緊隊，即係議員麥美娟話公民黨（公文袋）議員郭榮鏗早前拖延內會主席選舉，涉行為不檢。之不過，計埋呢個禮拜三嘅大會，本屆只係得番三次大會，如果民主派一直「拉布」，好大機會到會期結束都傾唔完所有譴責議案喇！