中環出更:高永文批袁國勇研究太片面

新冠肺炎疫情持續,早前香港大學微生物學系講座教授袁國勇團隊發表研究報告,喺乘搭港府派出嘅湖北包機返港人士,推算湖北省有二百二十萬人感染新冠肺炎。但昔日同窗食物及衞生局前局長高永文就批評研究「太片面」,仲認為作為專家應要根據科學原則研究。

袁推算220萬湖北人曾染疫

早前港府曾派出湖北包機,接滯留當地嘅港人返港,袁國勇嘅團隊分析咗返港人士嘅抗體,四百六十九名返港人士中有四百五十二人做咗血清測試,當中有十七人有新冠肺炎抗體。團隊按呢個數據推算,湖北省五千九百萬人口中可能有二百二十萬人曾感染新冠肺炎,認為確診人數比官方高。

高永文最近接受訪問時就質疑,淨係研究從湖北返港嘅港人,係咪有足夠嘅代表性可以代表到湖北省普遍嘅市民。佢認為唔值得用比較片面嘅資料,去做咁重要嘅假設,再投射一個數目出嚟。

高永文仲話作為專家應要跟番科學原則,用番事實根據去研究,而佢亦明白有部分專家會透過用「worst scenario(最壞嘅情況)」去令市民增加危機意識,但佢認為無論係基於乜嘢出發點,都應要基於實證科學。

卓妮

第一手消息請下載on.cc東網iPhone/iPad/Android/Windows Phone Apps