中環出更：職場共融 李垣錦：僱主最受惠
卓妮日前去咗由香港中央特區獅子總會舉辦嘅「十大傑出關愛學生選舉」，呢個活動嘅目的為提升社會對輕度智障學生嘅關注度，吸引商界開創多啲適合佢哋嘅職位，達致「受眾成授眾，共容更共融」。
現場見到香港中央特區獅子會會長周靄儀同國際獅子總會中國港澳三○三區第十二分域主席李垣錦（Stanley）當然有出席喇！Stanley話輕度智障學生有時只係與人溝通或表達方面比較差，但其他能力有時比普通人更強，曾經有位獅子會會員聘請一位剛畢業嘅輕度智障學生，發現佢記憶力好強，能夠一望barcode就講得出係邊件貨，Stanley話只要僱主可製造到合適嘅職位畀佢哋，表面睇好似幫咗佢哋，但分分鐘僱主先係最大受惠者。
國際獅子總會中國港澳三○三區姊妹學校計劃主席姚君偉（Gary）都大嘆好多後生唔捱得，佢由街邊擺檔捱到今時今日有自己嘅公司，話公司請售貨員，有十人約見，五個「放飛機」，最終請咗三個，得一個正式返咗工，結果呢位員工嘅家長打電話去公司質問，點解佢個仔做售貨員要負責埋清潔店舖，自此嗰位員工都冇再返工，Gary話唔可以怪晒啲後生，有時問題可能係出自父母太過呵護喎。
鄭淦元談工作：最重要有興趣
今次活動嘅大會主席鄭淦元（Ken）係一位花式跳繩教練總監，佢話讀書時代有玩過花式跳繩，畢業後就有師兄邀請佢加入助教行列，當年呢樣運動並唔普及，朋友同家人都好擔心佢冇前途搵唔到食，成日同佢講 「不如你正正經經搵番份工啦」，結果佢憑住努力做出成績，阿Ken話家人同朋友支持固然重要，但唔好太着重收入，最重要係搵番自己有興趣嘅工作，咁先有動力去捱出頭來。
卓妮