政情：公民講場：海洋公園瀕倒閉 邱騰華遲來獻計

海洋公園早前雖獲立法會撥款救亡，但若果唔扭轉入不敷支嘅困局，長貧難顧始終都唔係辦法。商務及經濟發展局局長邱騰華尋日就指公園日後主打保育工作亦要商業化，唔能夠再依賴門票收入、同消費甚少嘅快閃內地團，又話對於修訂《海洋公園公司條例》，以便拆牆鬆綁發展，會持開放態度添。邱騰華講到尾，咪就係要為公園擴大收入渠道囉。其實海洋公園財困都唔係一朝一夕嘅事啦！要去到瀕臨倒閉嘅地步先至醒悟到開源嘅重要，真係後知後覺。