政情：葉劉開特別會議傾教材編製 民主派聯署促法律澄清
因為民主派拉布，研究幼稚園、中小學教科書及教材編製小組委員會到依家仲未選到主席，有建制派議員早前建議話繞過小組委員會，由教育事務委員會召開特別會議討論，點知主席葉劉淑儀被質疑話月初否決召開特別會議，但日前就轉軚話開番，民主派議員尋日發出聯署信，要求法律顧問即時澄清葉劉嘅謬論，但葉劉就認為冇涉及法律問題。
轟「沒通過 非被否決」屬謬論
葉劉日前決定會召開特別會議，副主席葉建源就率先發信畀葉劉，要求葉劉收回決定。到尋日，民主派十三個議員就再聯署，話當日有關議案不獲通過，即當作被否決o架啦，但葉劉就話「沒有通過，並非被否決」，民主派鬧爆完全係謬論，要求法律顧問釐清此謬論，並即時撤回違反議決結果嘅開會指示。
之但係，葉劉就話睇唔出有乜嘢法律問題，話根據主席手冊，主席有權決定議程，仲話唔明白葉建源點解咁怕公開討論「係咪有好多教科書、教材及工作紙唔見得光？」葉劉又指教育工作者也需向社會問責。至於是否召開特別會議，佢就話正檢視委員會嘅回應。