尋日政府刊憲委任選舉主任同助理選舉主任。按往年慣例，選舉主任一般係由當區民政事務專員（DO）擔任。不過，今屆立法會選舉，五區直選選區嘅選舉主任都屬於跨區出任，換言之，今年會出現選舉主任大兜亂嘅情況。
立法會換屆選舉將於九月舉行，據《憲報》顯示，全港五個地方直選選區、即港島、九東、九西、新東、新西選區嘅選舉主任均跨區出任。當中，以往一般由中西區或東區民政專員擔任選舉主任嘅港島區，今年就由黃大仙民政專員出任；九西選區往常由深水埗或油尖旺民政專員擔任，今年就變成中西區民政專員頂上。
至於九東選區則由屬於九西嘅九龍城民政專員出任；負責新西選區嘅選舉主任則來自新東嘅沙田民政專員；而新東選區則換上離島民政專員負責。不過，各選區嘅助理選舉主任，則維持由當區民政專員及助理專員出任。
另一方面，擔任新界西選區嘅選舉主任，其地址並非位於新界西，而是中環海港政府大樓，意味新界西嘅參選人，要前往中環遞交申請表。
民政事務局發言人表示，安排非本區嘅民政事務專員作為地方選區嘅選舉主任，是希望選舉主任與候選人，排除過往工作上嘅緊密接觸，避免予人民政事務專員嘅角色，可能會影響選舉主任工作嘅觀感。選管會指，根據民政事務局嘅提名而委任選舉主任，是一如以往嘅做法。
議員張國鈞認為「跨區出任選舉主任」嘅安排合適，因為若由當區民政專員出任選舉主任，有可能與參選人有長期合作關係，無論確認對方嘅參選資格與否，都可能令人對其決定有所質疑；議員陳淑莊則質疑新安排是政府心虛。