凍薪不足息民怒 高官無能應下台

尋日係反修例風暴一周年,林鄭出席行會前見記者,緬懷過去又講咗一番「廢腑之言」,佢話過去一年香港經歷唔少困難、嚴峻局面,每個人都應該吸取教訓,包括政府和立法會議員,強調香港承受不起亂局!公共財政面對好大挑戰,是以政治委任官員,包括各司局長及佢自己在內,未來一年唔會按調整機制加薪!

喂!呢啲咪叫做指冬瓜話葫蘆囉!過去一年,政府止暴制亂無能,加上抗疫防疫又係乏善可陳,大人失業細路失學,港人活得實在辛苦,難展歡顏!而你哋班高官就飽食無憂米,林鄭仲要廢噏「每個人都應該吸取教訓」!

講真,你哋啲月入三、四十萬蚊嘅問責高官,有冇勇敢面對挑戰奮身盡力為香港吖?如果有,香港又何至於亂成一鍋粥?成個管治班子民望長期低殘,德不稱位,能不稱官,又何德何能配擁有高薪厚酬,人工高過歐美政要?依家凍薪一年又話與民「共度時艱」,偉大到亮過天邊那顆北極星!好心啦!如果稍有羞恥之心,應該主動減薪兩至三成啦,凍薪又何足以息民怨、平民憤喎!

回歸以來,社會所積累嘅深層次矛盾,就恍如雪球般愈滾愈大,重中之重嘅房屋政策一無是處,輪候公屋嘅名冊長過萬里長城;教育政策一塌糊塗,一場黑暴竟然有三千多名學生被捕!公營醫療體系長期負荷過重、標準工時及全民退保遙遙無期!嗱,根據政府最新數字,即使喺福利政策介入後,長者貧窮率仍高達近百分之三十一!咁就難怪七老八十嘅老人家仍然彎腰駝背在街上執紙皮!要言之,經濟、政治、民生無瓣掂,成班廢官自己就歲月靜好,基層市民就愁眉深鎖,你哋唔覺得自己尸位素餐而」𢭃咁高人工會有啲啲唔好意思咩?或覺得上天厚待你哋係家山風水好啫?

講起尸位素餐,功夫茶自不期然就彈出被外界炮轟為「避政司司長」嘅鄭若驊啦,佢霸住毛坑不拉矢,出道至今,民望長期食泥!嗱!最新民意調查結果顯示,佢評分僅得十八點七分,喺三名司長中繼續包尾,換句話講,即係又「墊司底」,被評表現拙劣!咁又真係冇講錯噃,司底驊失職瀆職,檢控無能常甩轆,廢到連大仙都話佢「扮嘢釣魚損法治」。一四年違法佔中三十九名搞手至今仍逍遙法外;黑暴以來被捕近九千人,而至今只千多人被起訴,其中仲要唔少因檢控甩漏而脫罪,佢有冇正視「警察拉人,法庭放人」嘅問題吖?唉!林鄭幾打得都冇用,為政不懂「審擇左右」,結果自己亦一褲都係,民望係歷屆特首中最低!一樣殘到阿爸都唔認得!一眾廢柴高官,一味吹得又唔問責下台,點息民怒吖?