笑看天下:魚骨形藍圖冇得頂

本報關心時事關心社會關心百姓,已經深入民心。大家必然記得假難民對香港造成嘅治安困擾,譬如他們參與販毒、賣淫、搶劫、打鬥,甚至淪為社團成員參與黑幫活動等等;本報投下巨大人力物力資源去跟進報道,期望特區政府加大力度去處理這個社會毒瘤,可惜這麼多年來,言者諄諄,聽者藐藐。

本報對處理假難民給予許多切實嘅建議,例如改善審核程序、設立禁閉營,並一直鞭策政府退出聯合國《禁止酷刑公約》!可惜咁多年嚟特首都側側膊唔多覺,情願豪花公帑養毒菌,笨到冇人有,唔通咁就叫做「事不避難」?不聽東方言,吃虧在眼前!假難民尾大不掉,遺禍至今,廢柴政府處理假難民問題,依老朽觀察,依然停留喺紙紮公仔階段,即係有神冇氣吖!

嗱!本報人才濟濟,眼見遊艇船隻泊位嚴重不足為人詬病,日前又來為廢柴政府借箸代謀,可謂用心良苦!本報視察本港多個水域後,構思海灣例如吐露港可變身遊艇俱樂部,設置魚骨形碼頭及泊位,以增加遊艇泊位數目,且井然有序,悅目醒神到呢!同之前觀塘避風塘船隻亂泊,真有雲泥之別!仲有喺岸邊提供康樂設施配套,畀船主及愛好水上活動嘅市民同時享受海灣!

魚骨形藍圖一曝光,各界齊齊叫好,可讓大量船隻有序停泊,亦可創造更多就業機會,而且唔應該只得私人遊艇會,要令多啲人可以享受到水上活動。本報藍圖提到嘅吐露港,事實已具備發展條件,老朽都冀望政府可以妥善規劃,並降低參加水上活動成本,讓一般市民都可以負擔。

萬事俱備,只欠政府積極考慮推動!之不過,對住呢個廢柴政府,老朽有生之年,希望享受吓岸邊風光,尤其是黃昏時看山頭吐月,紅盤乍湧,有三點式美女在玩水上活動,嘻哈笑語,恐怕會係奢望!