繼早前政府動用公帑挽救海洋公園，近日就慷慨入股私人公司，為管理不善嘅國泰航空解決財困。目前全球嘅經濟不景未見盡頭，政府注資喺持續虧損嘅航空公司可謂長貧難顧，況且挽救國泰嘅先例一開，其他同陷財困嘅航空公司或私人機構如果再告急，政府又應該點處理呢？加上注資金額龐大，極可能加劇政府嘅財政壓力，導致社會開支有所縮減。政府口口聲聲話要審慎理財，商經局局長邱騰華同運房局局長陳帆有無遵守到呢？
