政情：議事廳惡臭難頂 田二少匿去最後排
立法會喺上周審議《國歌條例草案》期間，議員陳志全同朱凱廸喺會議廳內灑潑液體，搞到會議廳內傳出陣陣惡臭，幾個議員位置都受牽連污糟咗。事隔差唔多一個星期，臭味唔單止冇減少，仲逼到議員田北辰（田二少）要逃離自己嘅位置，今日開始調去最後一排嘅座位，即議員鄭松泰隔籬，以往游蕙禎個位。
連坐開張櫈都換埋
問番田二少，佢就話今日開始會調位，佢話秘書處日前通知佢，話啲臭味好難頂，叫佢落去聞吓。而佢就只係置身會議廳片刻，都覺得惡臭依然縈繞未散，而成個議事廳當中就以佢個位最難聞，甚至連自己坐開嗰張櫈都換埋。
除咗要換櫈、換地氈，甚至換埋佢張木枱嘅假木紋表層，都似乎搞唔掂，懷疑啲臭水滲咗入張枱嘅深層木質，仲話秘書處決定會趁暑假換咗張枱嘞。