政情：荃灣打造花園城市 諮詢草率 政府七年來零進展
香港成日畀人話係石屎森林，荃灣區議會主席陳琬琛就建議荃灣區議會同埋政府盡快研究綠化荃灣區，令荃灣成為一個花園城市。不過土木工程拓展署只係二○一三年九月曾經喺荃灣區議會討論過荃灣綠化總綱圖，事隔七年市民都察覺唔到有關計劃有任何進展囉！去到尋日嘅大會上政府部門先表示願意種多啲植物。
植物雜亂無章 冇人打理
陳琬琛形容二○一三年嘅綠化諮詢草率，並唔深入。直到上年政府再提交資料文件，陳認為份資料文件都馬馬虎虎咁，政府亦都無就此同區議員討論。陳指出，自從二○一三年嘅諮詢後，已經經過咗兩屆區議會，荃灣區嘅變化都好大，所以陳去信區議會，希望可以將花園城市項目喺會上討論，要求其他政府部門例如康文署、房屋署同地政署等等參與，並希望政府可以再聽吓市民嘅意見先去規劃。尋日大會上陳琬琛就建議土木工程拓展署同民政署，可以同區議員開番個交流會先，兩個局都肯出席，陳依家安排緊時間同地方開會。
陳話荃灣依家主要唔夠綠化空間，就算有，啲植物都雜亂無章，冇乜人打理。陳覺得可以由政府建築物開始做起，整多啲綠色植物，佢又提議可以種多少少唔同品種嘅花，等市民有多個景點打吓卡都好吖嘛！