政情：民政處拒供場地開會 黃大仙區會拍門踩場
黃大仙區議會早前成立公民與政治權利專責小組，原本打算喺尋日召開會議，討論該區警民衝突同埋執法人員素質等事宜。但民政事務處對專責小組嘅職能有保留，決定唔提供場地、秘書處等支援，搞到二十多名區議員到區議會大樓抗議，仲逐個發言批評民政處打壓區議會職能，對民政處予以譴責，又高呼「抗議打壓、民政處可恥」、「區議會開會有理、堅持開會」等口號，展示寫有「強烈譴責黃大仙民政事務處政治打壓」嘅橫額。
揚言會有其他行動
區議會主席許錦成話，民政處唔支持開專責小組會議，係越權、錯誤同不合理嘅做法。佢話區議會只會「反彈」，同埋繼續用唔同方式做應該做嘅嘢，仲表示日後會有其他相應行動添。
其後，一眾區議員去到黃大仙民政事務處「踩場」，要求職員開放會議室，期間有區議員拍打民政處大門，大叫開門。另有區議員話下晝要舉行財政常務及經濟事務委員會會議，質疑點解議員早到，職員都唔畀進入，最後民政處職員畀區議員到休息室等待下午舉行嘅會議。