中環出更：收藏界擬設評級中心 馮炳壽嘆疫境逼延後
真金白銀搜羅收藏品，最怕就係遇上假貨。大中華香港收藏家協會創會會長馮炳壽，指與其憑直覺同經驗來分辨錢幣藏品孰真孰假，不如交由專職鑑別古物嘅機構來檢定，咁就可靠得多。而經過「驗明正身」嘅錢幣藏品，喺拍賣場上亦較容易得到收藏家嘅青睞。
馮炳壽話美國多年前已有專門鑑定錢幣嘅組織，後來內地有機構倣效呢種做法，除判別古錢幣嘅真偽，亦會依藏品嘅品相來評級，該件藏品他朝若要拍賣，就會有一個較為客觀嘅依據。而香港收藏界亦打算喺本地設立收件中心同相關儀器，待內地專家定期來港為錢幣藏品評級，但可惜防疫措施對人員往來構成妨礙，計劃無奈延後。
錢幣藏品獲評為真品固然值得高興，倘一旦遭鑑定為假貨，係咪等於一文不值呢？馮炳壽話難以一慨而論，佢舉例指民國初年，當時係有人私下仿製銀圓以解決錢幣供應不足嘅問題，只要仿製銀圓嘅白銀成色同官方銀圓相若的話，價值方面可謂不相上下，反觀存於世上嘅宋代銅錢數以噸計，就算年代久遠亦難賣高價，畢竟藏品嘅價值，始終離不開「物以罕為貴」呢個原則。
香港收藏家協會會長唐卓敏，指不肖商人有時會將贋品以魚目混珠嘅方式售出，而佢多年前就試過喺內地購入一批古代紙品，當中有兩張明代嘅契約，因其印刷字體不屬於古時嘅款式，所以佢推斷係偽造。
唐卓敏：可用嗅覺鑑古紙品
唐卓敏話鑑別古代紙品，有時嗅覺可派上用場，佢話古人喜歡將書籍或重要文件放入樟木籠存放以防蟲蛀，因此古代紙品往往帶有「書香」，而新出廠嘅紙就因生產過程從而帶有少許酸味。
善德基金會副主席梁天富，指收藏家若非手頭拮据，絕少放售其心頭好，因此古代藏品只會賣一件少一件，佢認為防止購入贋品嘅其中一個方法，係購買在生藝術家嘅作品，所以佢嘅收藏品，都係以當代藝術為主。
卓妮