政情：公民講場：教局引薦口罩爛尾 小學復課在即話之你

疫情趨於緩和，學校亦於上星期開始分階段復課。教育局嘅網站尋日就貼出文章，指政府嘅防疫工作絲毫沒有鬆懈，大家都不能掉以輕心，呼籲家長須敦促子女無論喺公共交通工具、街道還是校園之內，務必時刻佩戴口罩。文章講到呢度，問題就嚟嘞，教育局早前向學界引薦某口罩生產團隊為全港資助小學供應口罩一事，日前已宣告「爛尾」！好多家長都苦惱中童口罩特別難買，咁啱小學四年級至六年級學生又將於下周一復課。叫學生戴口罩講就容易，但教育局局長楊潤雄有無設身處地咁想過，家長同校方都撲唔到足夠中童口罩嘅徬徨心態呢？