政情：張可森告示涉煽暴 民署促跟進 陳樹英一味拖
屯門區議員張可森早前喺辦事處張貼寫上「屯門特訓」、「讓革命融入生活」嘅告示，涉嫌鼓吹參與不法行動，本身係民主黨（白鴿黨）嘅區議會主席陳樹英以資料太粗略，單憑告示上「革命」一字，難以界定張可森係咪違反區議員操守，去信民政總署話無法跟進，而民政事務總署尋日再促請陳秉公處理有關事件。民政總署回覆指已收到陳樹英嘅來信，整理咗全面嘅相關資料畀陳考慮。
陳：最快要下月處理
陳樹英話暫時未有時間查閱電郵，話如果經了解後，發現有實質權限都會跟進，但佢現時有其他公務在身，唔能夠即時處理，最快都要去到今年七月七日嘅大會先可跟進事件，同時會依照指引尋求一眾區議員意見，又話如果到時區議員覺得毋須要就此譴責張可森嘅話，會聽從區議員嘅意見決定點樣做。
事緣民政總署上月去信張可森，話收到有關佢喺議員辦事處張貼「屯門特訓」告示嘅投訴，署方指有關行為違反《區議員及區議會轄下委員會成員操守指引》，促佢盡快移除，又同時將投訴轉介畀陳樹英跟進，但陳回覆話無從跟進，當時有建制派區議員就直指陳同張係「自己人」，梗係維護張喇！