政情：電子煙加熱煙相提並論 邵家輝轟食衞局混淆視聽
《2019年吸煙（公眾衞生）（修訂）條例草案》審議中止但餘波未了，批發及零售界議員邵家輝仍然好有意見。日前佢就喺社交平台「不平鳴」，話譚文豪指摘佢有份拉死「禁電子煙草案」嘅講法好冤枉，又話食衞局想混淆視聽添。
不滿被指拉死草案
邵家輝嘅貼文劈頭就對譚文豪指摘佢聯同張宇人、郭偉強拉死「禁電子煙草案」嘅指控，相當不滿。佢話必須以正視聽，嗰條並唔係電子煙草案，而係有關加熱煙同電子煙兩類產品，不過反對派議員同食衞局一直將兩者混淆，導致市民誤會佢對禁電子煙持反對立場。其實佢係贊成禁電子煙，加熱煙就規管。食衞局想混淆視聽，佢覺得有責任指出問題所在，並沒有拉布。
邵家輝跟着就駁斥譚文豪，話譚若關心呢條草案通過，譚理應出席每一次會議，但事實係，呢個委員會之前八次會議，譚文豪只係出席過四次，而發言就只係得兩次，今年頭兩次嘅會議更是「零」出席！
委員會主席郭偉強同佢講，之前秘書問委員能否出席喺五月同六月舉行嘅九次會議，公民黨三人中只有郭家麒回覆，譚文豪連覆都無覆！