政情：中西區會叫囂威嚇民政處 政府表遺憾
中西區區議會政制及保安事務委員會尋日召開第三次會議，由於民政事務處拒絕為該委員會提供場地同秘書服務，故包括民主黨（白鴿黨）許智峯（峯鴿）在內嘅多名區議員無法進入會議室，要喺走廊開會。政府昨晚發出新聞稿，就多名中西區區議員召開唔符合《區議會條例》嘅會議，並威嚇該區民政事務專員同民政處職員，政府表示遺憾。
走廊開會 唔符合條例
中西區民政事務專員早前致函相關議員，建議佢哋修訂有關委員會名稱同職權範圍，以確保符合《區議會條例》條文同延期舉行會議，但係多名中西區區議員召開唔符合條例嘅會議，並喺民政處辦公範圍叫囂同作出威嚇，令該處人員深感不安。
政府對相關區議員粗暴無理行徑保留法律追究權利，並再次呼籲區議員聚焦地區民生事項，以和平理性、相互尊重態度，務實地就地區事務提供意見。