政情：同款電腦買貴兩倍 鄭若驊敗家贏條街
今年年初新冠肺炎疫情影響來勢洶洶，為減低傳播風險，政府一月尾宣布非提供緊急及必須公共服務嘅公務員在家工作，到五月頭先回復正常。不過期間就衍生咗另一個問題，唔同政府部門購買同一品牌同款式嘅手提電腦，價錢不一。形同鍵盤戰士、被外界炮轟為「避政司司長」嘅律政司司長鄭若驊，儘管民望經常「墊司底」，但以佢為首嘅律政司喺採購手提電腦嘅揮霍程度，可謂拋離其他部門幾條街，話說律政司同天文台所購買嘅手提電腦雖屬同一貨色，不過論單價，前者較後者高近兩倍！
天文台最慳家 每部僅七千
根據立法會日前公布《為在家工作政府人員提供資訊科技支援》附件，發現超過五十個政府部門由一月廿九日至四月底，曾經購買電腦軟件同硬件，或者提升通訊設備，但各個部門就算採購同款器材，價錢亦有好大差別。附件提到九個政府部門曾購買同一品牌同型號手提電腦，其中律政司司長辦公室要花費公帑一百三十七萬九千元購入七十部手提電腦，平均每部接近兩萬元，論單價係貴絕各個部門。而「最慳家」嘅係天文台，只需六千九百九十八元購入一部手提電腦。換句話講，律政司購買嘅手提電腦，每部都至少買貴咗約一萬三千元。
如果以數量計算，路政署係購買手提電腦最多嘅部門，買入手提電腦以及連同軟件嘅手提電腦，分別多達三百一十四同一百一十六部，其中淨係手提電腦嘅使費，路政署最少已用四百八十三萬五千元。
政務司長辦公室買貴Zoom
除咗手提電腦，視像通訊軟件Zoom係居家工作不可或缺嘅工具，共有十三個部門購買，當中十二個部門選用普通版Zoom，價格為一百一十七至一百二十五元；但係政務司司長辦公室採購同一版本Zoom，價錢竟然遠超其他部門，單價達一千五百七十二元，係其他部門嘅十二倍之多。而環境局或者環境保護署就花費六千元，購入四份專業版Zoom。
保安編碼器方面，保安局唔單止係使費最貴，亦同時係買得最多嘅部門，單價同數量分別為七百一十三元同六十個，埋單差唔多要成四萬三千元。買得「最划算」同最少係選舉事務處，每個只花費四百一十二元同購入廿個，合共八千二百四十元。
上任個幾月嘅創新及科技局局長薛永恒，上月透過書面回覆資訊科技界議員莫乃光查詢時，話政府部門為實施在家工作安排而採購嘅電腦同其他流動裝置或者器材，仲有提升通訊、網絡、數據庫容量，開支至少接近三千萬元。