中環出更：浪費成風 黃家和倡慢食文化
民以食為天，然而糧食生產佔全球溫室總排放量嘅四分一，人類要過低碳生活莫非就要捱餓？香港餐飲聯業協會會長黃家和早前出席某社交平台嘅訪談節目，提到人口不斷增長，但可種植嘅土地面積反而一路縮減，如何餵飽每一個人已經成為棘手嘅議題。因糧食由生產去到進入食客口腹嘅過程中，損耗或浪費嘅數量竟高達三成八，若果可以減少浪費，咁就好多問題都得以紓緩。不過好可惜，好多人要去到物資短缺嘅地步，先至明白珍惜衣食嘅重要。
過往黃家和喺美國居住十幾年，佢話彼邦物質充裕，浪費情況較為嚴重，雖然美國人都有糧食不足嘅警覺性，不過佢哋嘅思考方向並非係減少浪費，而係透過基因改造嚟提升糧食產量，至於對環境或者對人體會有何副作用，似乎不在考慮之列。黃家和認為，要扭轉目前嘅情況需由改變觀念入手，而只求填飽肚嘅速食文化就真係值得反思。反而近年興起嘅慢食文化，促使大家更為珍惜手頭上嘅食物，有利於人類社會嘅可持續發展。
丘雪祺用輕粘土修補香薰機
飲食有速食文化，衣着亦有快速時尚。時裝設計師、傑青丘雪祺指衣着本來係生活必需品，但於快速時尚概念下則淪為消耗品，對地球資源無疑係一大負擔。為減輕時裝生產對環境嘅損害，衣料宜選用真絲或棉等天然物料。至於唔再時興嘅舊衫，亦可以重新賦予二次生命，譬如有人會將牛仔褲修改為一條裙，又有人將舊恤衫變為一條褲。佢話解構舊衣物然後重新併合，對設計師嘅功力乃一大考驗。佢又話自己早前不慎撞崩陶瓷香薰機嘅一角，覺得就此丟棄未免可惜，結果自己用輕粘土修補。佢話見到舊物可以繼續為自己效力，就好似獲得新生命咁高興。
時裝界名人鄧婉穎，就認為買衫是否快速時尚只係次要，最重要係滿足自己嘅購物欲之餘，須確保所購衣物係咪切合自己嘅需要，同埋品質要經久耐用，否則衣物着一兩次就束之高閣，其實都係一種浪費。
卓妮